Verkföll BSRB hófust í dag

Verkföll aðildarfélaga BSRB eru hafin í sveitarfélögum landsins utan Reykjavíkur. Verkföllin standa yfir í dag og hálfan dag á morgun. Þeim verður fram haldið í næstu viku og fram til 9. júní.

Þórarinn Eyfjörð, formaður Sameykis, hitti í morgun starfsfólk í Grunnskóla Seltjarnarness og Frístundar vegna verkfallsins og sagði mikinn baráttug og samstöðu vera í hópnum. Félagsfólk í Sameyki sem starfar í Grunnskóla Seltjarnarness og Frístund eru í verkfalli heilan dag í dag og hálfan dag á morgun til að byrja með, en verkfall heldur svo áfram í næstu viku. Kristjana Hrafnsdóttir, skólastjóri Grunnskóla Seltjarnarness, sagði í fréttum RÚV að foreldrar hafi ákveðið að halda börnum sínum heima vegna verkfallsins en líka til að sína starfsfólki skólans sem eru í verkfalli stuðning.

„Við getum t.d. ekki tryggt öryggi nemenda í frímínútum og það voru einhverjir foreldrar sem ákváðu að halda börnum sínum heima. Við höfum líka fengið tölvupósta frá foreldrum sem ákváðu að halda börnum sínum heima til að styðja við þetta starfsfólk.“

Hjá öðrum aðildarfélögum BSRB leggur starfsfólk niður vinnu á leikskólum í Kópavogi, Garðabæ og Mosfellsbæ og í grunnskólum Kópavogs og Mosfellsbæjar. Í Mosfellsbæ er einnig verkfall hjá starfsfólki sem starfar á frístundaheimilum.

Fundir samninganefndar með ríkissáttasemjara hafa ekki borið neinn árangur. Sonja Ýr Þorbergsdóttir, formaður BSRB, segir það vera vegna skorts á samningsvilja af hálfu sambandsins. Hún sagði í samtali við fjölmiðla að markmið BSBR er að gera kjarasamning, en að grípa til aðgerða sé neyðarúrræði. Þá sagði hún mikil vonbrigði að Samband íslenskra sveitarfélaga sýni engan samningsvilja.

Sonja Ýr segir að í grunninn sé BSRB að krefjast leiðréttingar á misrétti í launum félagsfólks síns gagnvart fólki sem er í öðrum stéttarfélögum og telur það vera brot á jafnréttislögum. Krafa BSRB er sú að launafólk aðildarfélaganna fái sömu laun og samið hefur verið um fyrir aðra starfsmenn sem vinna sömu eða sambærileg störf og að sú launahækkun miði við 1. janúar eins og hjá öðrum, en ekki 1. apríl eins og sveitafélögin gera kröfu um. Eins og áður sagði hafa fundir hjá Ríkissáttasemjara ekki skilað neinum árangri og ekki hefur verið boðað til annars fundar hjá embættinu.

 

VR styður verkfallsaðgerðir BSRB
Stjórn VR lýsir yfir fullum stuðningi við verkfallsaðgerðir félaga í BSRB. Félagsfólk aðildarfélaga í BSRB krefst jafnréttis á vinnumarkaði, sömu launa og annað launafólk fyrir sama eða sambærilegt starf. Jafnrétti er ein grundvallarkrafa verkalýðshreyfingarinnar og VR styður þær aðgerðir sem BSRB telur nauðsynlegar til að knýja það fram, segir á vef félagsins.

 

Hér fyrir neðan má sjá yfirlit verkfalla BSRB.