- júlí 2026
Við hjá Sameyki fylgjum nú eftir félagsfólki okkar sem sagt var upp hjá Reykjavíkurborg í síðasta mánuði. Við leggjum mikla áherslu á að okkar fólk fái upplýsingar um réttindi sín og leiðbeiningar við næstu skref.
Við erum meðal annars að aðstoða fólk við að óska eftir rökstuðningi fyrir uppsögnum, þar sem þess er óskað, en mikilvægt er að það sé gert innan tilskilins frests sem eru 14 dagar frá uppsögn.
Við veitum einnig ráðgjöf um uppsagnarfrest, réttindi samkvæmt ráðningarsamningi og kjarasamningi, styrki úr sjóðum, gögn vegna starfsloka og önnur atriði sem geta skipt máli.
Réttindi og styrkir í uppsagnarfresti
Í uppsagnarfresti heldur þú almennt réttindum þínum samkvæmt ráðningarsamningi og kjarasamningi. Jafnframt heldur þú réttindum þínum hjá Sameyki sem fullgildur félagsmaður út uppsagnarfrest.
- Þú heldur launum, ávinnslu orlofs, lífeyrisiðgjöldum, veikindarétti og öðrum starfskjörum
- þú heldur rétti til styrkja eða þjónustu úr sjóðum, t.d. vegna náms, starfsþróunar, heilsu, líkamsræktar eða endurhæfingar, sjá réttindi inni á mínum síðum Sameykis
- Þú getur bókað laus orlofshús, keypt útilegukort, veiðikort og gjafabréf í flug
- Þú getur skráð þig á námskeið hjá Starfsmennt
Við hvetjum félagsfólk okkar til að kynna sér og nýta þau réttindi og styrki sem það kann að eiga rétt á, enda geta þau skipt máli á tímum breytinga.
Annað sem gott er að hafa í huga
Gott er að geyma öll gögn sem tengjast uppsögninni, svo sem uppsagnarbréf, tölvupósta og ráðningarsamning. Ekki er ráðlegt að skrifa undir starfslokasamning eða önnur gögn án þess að fá ráðgjöf fyrst.
Einnig er mikilvægt að kanna stöðu atvinnuleysisbóta, skráningu hjá Vinnumálastofnun og hvaða áhrif starfslok geta haft á réttindi, greiðslur og sjóðsaðild.
Samskiptaleiðir og aðstoð
- Bóka ráðgjöf frá kjaradeild
- Netfang: kjaradeild@sameyki.is
- Sími: 525 8330
- Mínar síður