Skilti með öryggisnúmeri í hvert hús í Munaðarnesi

Stefnt er að því að klárað verði að setja upp skilti fyrir sumarið með GPS staðsetningu (öryggisnúmer) í orlofshús Sameykis í Munaðarnesi. Um er að ræða öryggismerkingu með fasteignanúmeri og neyðarnúmerinu 112 í hvert orlofshús á svæðinu. Tilgangur merkinganna er að auka öryggi félagsfólks og fjölskyldna þeirra sem dvelja í orlofshúsum félagsins á svæðinu ef upp koma neyðartilfelli. Þá er stefnt að því að setja upp eins skilti í öll önnur orlofshús í eigu félagsins.

Dæmi eru um að í neyðartilvikum hafi björgunaraðilar farið í rangt orlofshús vegna ónákvæmra upplýsinga um staðsetningu þess sem óskar eftir aðstoð.

Því geta öryggisnúmerin (GPS staðsetning) í hverju orlofshúsi komið í veg fyrir að mikilvægur tími björgunarliðs fari til spillis í neyðartilvikum. Þannig geta davalargestir með einföldum hætti látið vita ef vá steðjar að og látið Neyðarlínuna vita með því að hringja í 112 og gefið upp öryggisnúmerið.