Gleðilegt nýtt ár

Ég vona að árið hafi farið vel með ykkur. Fordæmalaust ár er liðið og kemur ekki aftur og eins og ég heyrði einhvern segja: ,,sem betur fer‘‘. Það er bráðum ár síðan við hittumst síðast en það var á þorrablóti okkar í febrúar á síðasta ári í fallegum sal í Framheimilinu Sogamýri. Við horfum bara bjartsýn fram á veginn því betri tíð með blóm í haga bíður okkar. Við höldum bara ótrauð áfram og hlökkum til að geta hist á ný og gert eitthvað skemmtilegt saman. Við þurftum að fella niður Jónsmessuferðina okkar í júní síðastliðinn sem við ætluðum svo að breyta í haustlitaferð í þeirri von að ástandið hefði breyst til batnaðar en allt kom fyrir ekki, aðstæður í þjóðfélaginu buðu ekki upp á neinar samkomur né ferðalög. Vonandi getum við farið eitthvað á Jónsmessunni í ár. En hvað um það lífið heldur áfram.

Ég vil minna ykkur á skrautfjöðrina okkar Símenntunarsjóð og hvet ykkur til að vera dugleg að nýta ykkur hann. Næsta úthlutun er í maí. Síðasta úthlutun sem var í haust fór snurðulaust fram því tæknin er okkur hliðholl og það er svo margt sem hægt er að gera á netinu og í gegnum síma. Við höfum ekki getað haft aðalfund vegna samkomutakmarkana en við trúum því að þetta sé allt á næsta leyti. Bólusetning er jú handan við hornið og sumir búnir að fá sprautuna. Gönguhópurinn okkar Grjótharðir göngugarpar hefur haldið áfram að hittast á miðvikudögum í hvaða veðri sem er. Að vísu hafa færri séð sér fært að taka þátt en við höldum áfram að hittast á þeim fjórum stöðum sem við hittumst á og fögnum hverjum þeim sem slæst í hópinn. Það er fátt sem bætir geðið meira en útivist og hreyfing og ekki skemmir að vera í góðum félagsskap. Það er mjög gaman hjá okkur, mikið spjallað og mikið hlegið.

Kæru félagar, ég vona að við getur bráðum komið saman á ný.

Hlakka til að sjá ykkur, kær kveðja,
Ingibjörg Óskarsdóttir, formaður lífeyrisdeildar.