Að loknum kosningum

Nú hefur íslenska þjóðin enn á ný kosið sér fulltrúa á Alþingi. Með atkvæði sínu eru kjósendur að sýna í verki að þeir treysta á stefnu-mið tiltekinna stjórnmálaflokka og á orð þeirra frambjóðenda sem þar eru í forystu. Eins og dæmin sanna þá getur verið tvísýnt um, og jafnvel verið undir hælinn lagt, hvort að stjórnmálaöfl komi heitstrengingum sínum í framkvæmd. Jafnvel er hægt á stundum að efast um að flokkarnir hafi nokkurn vilja til að vinna að því sem lofað var í kosningabaráttunni. En af hverju er ég að draga þetta fram? Jú, vegna þess að þó að við getum ekki kosið okkur Alþingi nema á fjögurra ára fresti, þá getum greitt atkvæði um það hvern einasta dag hvort við kjósum að bæta samfélag okkar.

Eða ekki.

Í samræðum á vinnustað, í uppeldi barnanna okkar, mótmælastöðu á Austurvelli, þátttöku í kórastarfi, tillitssemi í umferðinni, miðakaupum í dansskóla með makanum, í hlutverki trúnaðarmanna á vinnustöðum, þegar við kaupum happdrættismiða af Blindrafélaginu eða björgunarsveitinni, þá erum við bæði í kosningabaráttu og að kjósa. Svo ekki sé nú talað um virka þátttöku í stéttarfélagi og verkefnum þeirra. Með framgöngu okkar og orðræðu erum við að tala fyrir betra lífi, sanngjarni dreifingu auðæfa, hjálpsemi, samkennd og samvinnu. Og því að enginn sé skilinn eftir í hjálparleysi.

Á aðalfundi Sameykis síðastliðið vor samþykktu félagsmenn meðal annars ályktanir sem snúa að auðlindum í þjóðareigu og þeirri kröfu að eignaréttur þjóðarinnar verði tryggður til heilla fyrir allan almenning, en ekki til auðsöfnunar fárra. Þar var einnig fjallað um spillingu og misbeitingu valds í þágu einkahagsmuna. Þar var einmitt bent á rannsóknir sem sýna að spillingin á Íslandi þrífst helst í kringum auðlindir þjóðarinnar og stjórnmálin í landinu. Einnig var á aðalfundinum rætt um nauðsyn þess að stjórnvöld og atvinnurekendur horfist í augu við skakkt verðmætamat samfélagsins á kvennastörfum og að gripið verði til aðgerða til að útrýma misréttinu sem af því hlýst. Og í umræðunni um umhverfismál og réttlát orkuskipti leggur Sameyki áherslu á að stjórnvöld verði við þeirri kröfu verkalýðshreyfingarinnar að saman verði unnið að stefnu um réttlát orkuskipti hér á landi í þríhliða samstarfi stjórnvalda, verkalýðshreyfingarinnar og atvinnurekenda.

Kosningabaráttan um jafrétti, sanngirni og jöfnuð mun halda áfram þó að kosningum til Alþingis sé nú lokið. Baráttan fyrir hagsmunum almennings heldur áfram og í allri framgöngu okkar þá erum við að greiða því atkvæði í hvers konar samfélagi við viljum lifa.

Kjósum því rétt!