Stofnanir ársins 2021

Sameyki stéttarfélag í almannaþjónustu tilkynnti um valið á Stofnun ársins 2021 á hátíð sem haldin var í gær en titlana Stofnun ársins og Stofnun ársins – borg og bær hljóta þær stofnanir sem þykja  skara fram úr í þeim þáttum sem könnun Sameykis náði yfir að mati starfsmanna þeirra.

Stofnanir ársins 2021 eru: Heilsustofnun NLFÍ, Menntaskólinn á Egilsstöðum, Jafnréttisstofa og Frístundamiðstöðin Tjörnin. Hástökkvarar ársins eru Ríkiskaup og Frístundamiðstöðin Miðberg.

Könnunin náði til um 31 þúsund starfsmanna í opinberri þjónustu, bæði hjá ríki, Reykjavíkurborg, sveitarfélögunum og sjálfseignarstofnunum. Hún er unnin í samstarfi við Fjármála- og efnahagsráðuneytið og gefur mikilvægar upplýsingar um stöðu starfsmanna á opinbera vinnumarkaðnum. Í henni eru þátttakendur spurðir út í níu þætti í starfsumhverfinu þ.e. trúverðugleika stjórnenda, starfsanda, launakjör, vinnuskilyrði, sveigjanleika í starfi, sjálfstæði í starfi, ímynd stofnunar, ánægju og stolt og jafnrétti. Markmiðið með að velja fyrirmyndarstofnanir er að hvetja stjórnendur stofnana til að huga að mannauðsmálum og auka umræðu um aðbúnað og líðan starfsmanna á vinnustöðum. Alls fengust gild svör frá rúmlega 13.300 starfsmönnum og svarhlutfallið var 43 prósent.

Niðurstöðurnar voru kynntar að loknu vel heppnuðu málþingi um mannauðsmál og var yfirskrift þess, Vellíðan og vöxtur með betri vinnutíma. Hátíðin Stofnun ársins og málþingið var haldið á Hilton Nordica þar sem Sóley Kristjánsdóttir sérfræðingur á sviði mannauðsmála, Bára Hildur Jóhannsdóttir verkefnastjóri betri vinnutíma í vaktavinnu, Guðrún Snorradóttir stjórnendaþjálfi og Auðunn Arnórsson MPA fjölluðu um mannauðsmál í víðum skilningi og vellíðan og vöxt með betri vinnutíma.

Eftirfarandi stofnanir hljóta titilinn Stofnun ársins og Stofnun ársins – borg og bær en þeim er skipt niður eftir stærð stofnana.

Stofnun ársins 2021 – borg og bær: Frístundamiðstöðin Tjörnin

Hástökkvari ársins 2021: Frístundamiðstöðin Miðberg

Stofnun ársins 2021 - ríkisstofnanir og sjálfseignastofnanir:
Heilsustofnun NLFÍ (90 starfsmenn eða fleiri)
Menntaskólinn á Egilsstöðum (40-89 starfsmenn)
Jafnréttisstofa (færri en 40 starfsmenna)

Hástökkvari ársins 2021: Ríkiskaup

Sameyki stéttarfélag í almannaþjónustu óskar starfsmönnum og stjórnendum Stofnana ársins, Fyrirmyndastofnana og Hástökkvurum innilega til hamingju með glæsilegan árangur.

Hægt er að lesa sérritið Stofnun ársins hér með því að smella á forsíðu þess.

Allar nánari upplýsingar má líka finna hér á vef Sameykis.

Skoðaðu ljósmyndirnar frá Stofnun ársins hér.

Skoðaðu ljósmyndirnar frá málþinginu hér.