Formaður BSRB segir áróður SA ekki standast skoðun

Sonja Ýr Þorbergsdóttir formaður BSRB spyr í pistli sínum, sem lesa má hér, hver tilgangur Samtaka atvinnulífsins sé með áróðri sínum um að ríkið sogi til sín starfsfólk af almenna vinnumarkaðnum þar sem SA vitnar í nýja rannsókn sem samtökin létu gera fyrir sig. Þá segir hún að Samtök atvinnulífsins taki ekki tillit til áhrifs heimsfaraldursins á samfélagið og vinnumarkaðinn.

„Það er svo sem ekki nýtt að Samtök atvinnulífsins velji að líta fram hjá áhrifum heimsfaraldurs kórónaveirunnar á almannaþjónustuna. Þau hafa þvert á móti komið áróðri sínum um fjölgun opinberra starfsmanna á framfæri með reglubundnum hætti. Það er sannarlega rétt að á undanförnum tveimur árum hefur starfsfólki fækkað á almennum vinnumarkaði á sama tíma og starfsfólki í opinbera geiranum fjölgaði,“ segir Sonja Ýr.

Þá segir formaður BSRB að tilgangur áróðurs SA sé til að hafa áhrif á skiptingu verðmæta og kannski að vekja andúð á sanngjarnri skattheimtu fyrir notkun á auðlindum Íslands.

„Mögulega er kveikjuna að áróðri SA einfaldlega að rekja til aukinnar umræðu um hvernig við skiptum þeim verðmætum sem skapast af ríkulegum fiskimiðum í kjölfar Verbúðarinnar. Eða kannski er kveikjan einfaldlega að samtökin eru almennt andsnúin aukinni skattheimtu af hvers kyns toga og benda ítrekað á að jöfnuður sé hvað mestur hér á landi. Þrátt fyrir að þau þekki jafnvel og aðrir að eignaójöfnuður er að aukast og margir hafi hagnast verulega vegna faraldursins.“

Pistil Sonju Ýr Þorbergsdóttur, formanns BSRB, má lesa hér.