Grunnstoðir velferðarsamfélagsins grundvallast á jöfnuði og jafnrétti

„Stefna BSRB er leiðarljós okkar í hagsmunabaráttu starfsfólks í almannaþjónustu. Hún er bæði grundvöllur alls starfs bandalagsins næstu árin og forsenda þeirrar samstöðu sem nauðsynleg er til að ná okkar metnaðarfullu markmiðum í þágu launafólks.”

Í stefnu BSRB fyrir aðildarfélög bandalagsins og félagsfólk þeirra koma fram tólf stefnumál þar sem fjallað er um almannaþjónustu og almannatryggingar, atvinnumál, efnahags- og skattamál, heilbrigðismál, húsnæðismál, jafnréttismál, kjaramál, menntamál, starfsumhverfi starfsfólks í almannaþjónustu og umhverfis- og loftlagsmál. Allt eru þetta brýn stefnumál sem varðar íslenskt samfélag og almenning allan sem mótuð voru á framhaldsþingi bandalagsins sem haldið var í lok mars sl.

 

Grunnstoð velferðarsamfélagsins
Hlutverk BSRB er að vera leiðandi afl í hagsmuna- og réttindabaráttu launafólks sem starfar með einum eða öðrum hætti í almannaþjónustunni og er heildarfjöldi félagsfólks í BSRB 23 þúsund talsins. Fomaður BSRB er Sonja Ýr Þorbergsdóttir og varaformaður þess er Þórarinn Eyfjörð. Sameyki stéttarfélag í almannaþjónustu er stærsta aðildarfélagið innan BSRB. Sameyki átti 94 þingfulltrúa á framhaldsþinginu.

BSRB myndar stefnu sinna baráttumála til að veita stjórnvöldum aðhald og hvetur til þess að þau hugi að almannaþjónustunni áður en ákvarðanir eru teknar sem hafa áhrif á innviði þjóðarinnar, almenning og starfsfólk í almannaþjónustu. Öflug almannaþjónusta er ein af grunnstoðum velferðarsamfélagsins.

 

Gildi verkalýðshreyfingarinnar um velferðarkerfið
Í stefnu BSRB um almannaþjónustuna segir að eitt af meginhlutverkum hins opinbera er að halda uppi öflugu velferðarkerfi þar sem landsmönnum er tryggð örugg framfærsla, heilbrigðis- og félagsþjónusta, menntun og öryggi, óháð búsetu. Velferðarkerfið á að fjármagna úr sameiginlegum sjóðum landsmanna og tryggja öllum framúrskarandi þjónustu án tillits til greiðslugetu. Reynslan sýnir að velferðarþjóðfélag verður ekki reist nema á gildum samvinnu og jafnaðar, gildum sem verkalýðshreyfingin hefur haldið á lofti frá öndverðu.

Þá er þess krafist að brugðist verði við auknum eignaójöfnuði með stóreignaskatti á hreina eign þeirra allra ríkustu og að tekjur og eignamyndun eignarhaldsfélaga sem ekki eru í atvinnurekstri verði skattlagðar hjá eigendum. Ísland er ríkt af auðlindum. BSRB krefst þess að þjóðin fái réttmæta hlutdeild í arðinum sem skapast af nýtingu einkaaðila á auðlindum með auðlindaskatti.

 

Alfarið á móti einkavæðingu í heilbrigðiskerfinu
BSRB leggst alfarið gegn markaðsvæðingu heilbrigðisþjónustu og gjaldtöku sem byggir á hagnaðarsjónarmiðum. Einkarekstur dregur úr skilvirkni kerfisins, yfirsýn og samhæfingu, eykur hættu á oflækningum og torveldar eftirlit með gæðum og umfangi. Einkavæðing eykur líka þrýsting á launalækkanir, fækkun starfsfólks og uppsagnir starfsfólks með mikla reynslu og hærri laun til að auka hagnað af rekstrinum sem rennur þá í vasa eigendanna á kostnað launafólks og gæða þjónustunnar.

 

Húsnæðisöryggi eru mannréttindi
Bjarg, leigufélag BSRB og ASÍ er burðarásinn í almenna íbúðakerfinu og stuðlar að húsnæðisöryggi launafólks í lægri tekjuhópum. BSRB leggur ríka áherslu á að árleg stofnframlög frá ríki og sveitarfélögum verði aukin til að flýta fyrir uppbyggingu kerfisins og mæta brýnni þörf launafólks fyrir húsnæði á viðráðanlegu verði. BSRB leggur áherslu á að ríki og sveitarfélög greiði götu leigufélagsins Blævar, sem er leigufélag í eigu BSRB og ASÍ. Mikilvægt er að auka valkosti launafólks á húsnæðismarkaði sem er yfir tekjuviðmiðum í almenna íbúðakerfinu og stuðla þannig að húsnæðisöryggi fyrir alla.

Hægt er að lesa stefnu BSRB hér.