Ekki samið fyrr en gengið verður frá samkomulagi um jöfnun launa

Þórarinn Eyfjörð, formaður Sameykis, setti fund í Fulltrúaráði félagsins í dag. Fór hann yfir fundi samninganefnda sem verið hafa undanfarið með viðsemjendum. Sagði hann að samninganefnd Samtaka atvinnulífsins stæði fast á því að starfsfólk opinberra hlutafélaga fengi ekki meira en það sem búið væri að semja um í gegnum kjarasamning Starfsgreinasambandsins á almenna markaðnum. Hann sagði fundargestum að það gengi ekki upp því launatafla þessa launafólks er stærri en sú launatafla sem SGS samdi um við Samtök atvinnulífsins. Sameyki semur fyrir hönd þessa launafólks um kjarabætur samkvæmt launatöflum en ekki markaðslaunum, sem ekki er hægt að semja um í kjarasamningum eins og gefur að skilja. Launatafla SGS nær engan veginn utan um launatöflu þessa hóps innan Sameykis sem semja þarf um.

„Við bíðum átekta hvað gerist nú í kjaradeilum á almennum vinnumarkaði og bregðumst svo við í kjölfarið. Samningar þessa hóps launafólks [ohf.] eru gerðir í kjölfar kjarasamninga á almennum markaði. Þá er staðan sú í dag að við göngum ekki frá kjarasamningum fyrr en búið er að ganga frá samkomulaginu um jöfnun launa milli markaða sem undirritaðir voru 2016. Það samkomulag mun hafa áhrif á kjarasamninga. Þá er starfsfólk á opinberum vinnumarkaði búið að standa við sinn hlut í því samkomulagi eins og kveðið var á um og margoft hefur verið bent á.“