BSRB svarar yfirlýsingu Sambands íslenskra sveitarfélaga

BSRB svarar á vef sínum yfirlýsingu SÍS sem birtist á vef sambandsins í dag. Þar er þess krafist að BSRB stöðvi auglýsingaherferðina strax í dag. Raunin er sú að BSRB er þegar búið að stöðva allar birtingar herferðinnar fyrir rúmri viku síðan til að liðka fyrir um gerð kjarasamninga.

 

Vegna kröfu SÍS um auglýsingaherferðina um sömu laun fyrir sömu störf
Fyrir rúmlega viku hafði fulltrúi Sambands íslenskra sveitarfélaga samband vegna þess sem Sambandið taldi vera ólögmæta auglýsingaherferð BSRB. BSRB hafnar því að auglýsingaherferðin brjóti í bága við lög. Meginmarkmið hennar að vekja athygli bæjar- og sveitastjórna á ábyrgð þeirra gagnvart eigin starfsfólki um að mismuna þeim ekki í kjörum. Til að reyna að liðka fyrir um gerð kjarasamninga ákvað bandalagið hins vegar að verða við ósk Sambandsins um að herferðin yrði tekin úr birtingu og var það gert 1. júní síðastliðinn. Frá þeim tíma hafa ekki neinar auglýsingar verið birtar á vefmiðlum eða umferðaskiltum. Fyrir þann tíma hafði prentuðu efni s.s. plakötum og skiltum verið dreift til aðildarfélaganna 11 og félagsfólks þeirra sem eru um 7000.

BSRB sýnir því skilning að sveitarfélögum finnist erfitt að sitja undir því að vera sökuð um mismunun - hins vegar væri árangursríkast fyrir þau að beina orku sinni að því að leiðrétta hreinlega þann launamismun sem átti sér stað fyrstu þrjá mánuði ársins. Þessi yfirlýsing Sambands íslenskra sveitarfélaga er enn leiðin til að afvegaleiða umræðuna frá kjarna málsins, sem er að sveitarfélögum landsins ber að greiða starfsfólki sínu sömu laun fyrir sömu störf.

Hægt er að lesa yfirlýsingu SÍS hér.