Stofnanir ársins 2023

Sameyki stéttarfélag í almannaþjónustu tilkynnti um valið á Stofnun ársins 2023 fyrr í dag en titlana Stofnun ársins og Fyrirmyndarstofnun hljóta þær stofnanir sem þykja skara fram úr að mati starfsfólks á sviði mannauðsmála.

Ár frá ári hefur þátttaka í könnuninni aukist og aldrei hefur verið betri þátttaka í Stofnun ársins en nú. Í ár tóku nærri 17.000 þátt í könnuninni sem var framkvæmd í október og nóvember 2023. Reykjavíkurborg er þátttakandi í könnuninni með allt sitt starfsfólk í annað sinn en allt starfsfólk hjá ríkinu hefur tekið þátt síðan 2011.

Stofnun ársins 2023 – borg og bær: Vesturmiðstöð. Ljósmynd/BIG

Val á stofnun ársins er samstarfsverkefni margra aðila; Sameykis, Kjara- og mannauðssýslu ríkisins, Mannauðs- og starfsumhverfissviðs borgarinnar og svo að sjálfsögðu stofnananna og starfsstaðanna. Niðurstöður könnunarinnar veita bæði afar mikilvægar upplýsingar um starfsumhverfi vinnustaða og samanburð við aðrar stofnanir. Í könnuninni er hægt að bera saman starfsumhverfi ríkis og borgar með góðum hætti.

Hildur Ragnarsdóttir, forstjóri Þjóðskrár, tók á móti viðurkenningunni. Ljósmynd/BIG

Tilgangur með vali á Stofnun ársins er að taka eftir og verðlauna vinnustaði sem ná framúrskarandi árangri við stjórnun mannauðs. Þá nýtist könnunin stjórnendum til að vinna að umbótum í stjórnun og starfsumhverfi. Að lokum veitir könnunin aðhald til hagsbóta fyrir starfsfólk, skjólstæðinga, viðskiptavini og aðra hagsmunaaðila.

Njörður Njarðarson, forstöðumaður Félagsmiðstöðvarinnar Sygin hélt þakkarræðu á Stofnun ársins 2023. Ljósmynd/BIG.

Titlana Stofnun ársins 2023 hljóta þær stofnanir sem þykja skara fram úr í þeim þáttum sem könnun Sameykis náði yfir að mati starfsfólks þeirra.

Stofnanir ársins 2023 – borg og bær eru: Vesturmiðstöð, Hitt húsið og Félagsmiðstöðin Sigyn.
Hástökkvari ársins 2023 hjá borg og bæ er Íbúðakjarni Hringbraut B.

Stofnanir ársins 2023 – ríki eru: Fjölbrautarskóli Suðurnesja, Þjóðskrá Íslands og Framhaldsskólinn í Vestmannaeyjum.

Hástökkvari ársins 2023 hjá ríkinu er Hugverkastofan.

Stofnanir ársins 2023 – sjálfseignastofnanir og fyrirtæki í almannaþjónustu er: Heilsustofnun NFLÍ.

Niðurstöðurnar voru kynntar að loknu vel heppnuðu málþingi um mannauðsmál og var yfirskrift þess Velsæld á vinnustað. Fyrirlesarar á málþinginu voru: Helena Jónsdóttir, klínískur sálfræðingur, Sóley Kristjánsdóttir, stjórnenda- og vinnustaðaráðgjafi hjá Gallup, Ragnhildur Vigfúsdóttir, mark- og teymisþjálfi og Tómas Bjarnason, sviðsstjóri stjórnendaráðgjafar Gallup.

Fyrirmyndarstofnanir ársins í öllum flokkum má sjá í sérritinu hér. Þar eru nánari niðurstöður úr könnuninni. Allar nánari upplýsingar má líka finna á vef Sameykis, sjá hér.

Ljósmyndir frá málþinginu og hátíðinni er hægt að skoða hér.