Sterk hreyfing – sterkt samfélag

Yfirskrift á baráttudegi launafólks 1. maí í ár er STERK HREYFING – STERKT SAMFÉLAG. Með sterkri verkalýðshreyfingu sem ver réttindi og bætir kjör launafólks með samstöðu skapast sterkara samfélag. Verkalýðshreyfingin, grasrót launafólks, hefur í gegnum tíðina verið það afl almennings sem breytt hefur samfélaginu og náð fram réttindum sem almenningur lifir við í dag; kosningarétt til sveitarstjórna og Alþingis, löggjöf um vinnuvernd, almannatryggingar, orlof og lífeyrissjóði, samningsstöðu gagnvart atvinnurekendum, bætt laun, styttri vinnutíma, matar- og kaffitíma, veikindarétt, sjúkrasjóði, sumarfrí, öryggi á vinnustað, fæðingarorlof og feðraorlof. Öll þessi réttindi náðust fram með baráttu verkalýðshreyfingarinnar í samningum við atvinnurekendur.

Stéttarfélögin og bandalög þeirra á opinberum og almennum vinnumarkaði standa sameininlega að hátíðarhöldum um land allt 1. maí. Ræðumenn í Reykjavík á Ingólfstorgi verða Þórarinn Eyfjörð, formaður Sameykis og Sólveig Anna Jónsdóttir, formaður Eflingar. Fundarstjóri verður Arna Jakobína Björnsdóttir, formaður Kjalar á Akureyri.

Úlfur Úlfur og Bríet sjá um tónlistar-flutning á Ingólfstorgi og að sjálfsögðu verður Internasjónalinn sunginn með undirleik Lúðrasveitar verkalýðsins.

Sameyki hvetur allt félagsfólk til að fjölmenna í kröfugönguna sem hefst kl. 13:30. Gengið verður frá Skólavörðuholti niður Skólavörðustíg, Bankastræti og vestur Austurstræti inn á Ingólfstorg þar sem hátíðardagskrá fer fram og eldræður verða fluttar um samstöðu, verkalýðsbaráttu og samfélagsbreytingar. Kaffiveitingar verða í boði BSRB eftir að dagskrá lýkur á Ingólfstorgi í Félagamiðstöðinni á Grettisgötu 89. Kvennakór Reykjavíkur sér um veitingar og er allt félagsfólk velkomið að þiggja þær í BSRB-húsinu.

Sjá viðburðarsíðu stéttarfélaganna 1. maí hér.