Atkvæðagreiðsla um boðun yfirvinnu – og þjálfunarbanns auk vinnustöðvunar

Samninganefnd Sameykis samþykkti á fundi sínum þann 28. apríl 2024 að efna til atkvæðagreiðslu um vinnustöðvun meðal félagsfólks Sameykis sem starfar hjá Isavia ohf. Samninganefnd Sameykis hefur reynt að ná samningum við SA/Isavia án árangurs. Á félagsfundi sem haldinn var þann 11. apríl sl. kom í ljós einhuga skoðun félagsfólks að reyna með aðgerðum að ná fram okkar kröfum. Því leggjum við í ykkar hendur kosningu um ótímabundið yfirvinnubann (tekur ekki til fastrar yfirvinnu hvort sem hún er unnin eða óunnin) og ótímabundið þjálfunarbann allra félagsmanna Sameykis sem starfa hjá Isavia ohf. ásamt tímabundnum og tímasettum vinnustöðvunum hjá ákveðnum hópum innan Isavia ohf., sjá nánara fyrirkomulag hér að neðan. Tillaga þessi er lögð fram í samræmi við 14., 15. og 16. gr. laga nr. 80/1938 um stéttarfélög og vinnudeilur.


Sameyki auglýsir hér með almenna leynilega rafræna atkvæðagreiðslu um boðun yfirvinnubanns og vinnustöðvunar sem mun ná til félagsfólks Sameykis sem starfa hjá Isavia og vinna samkvæmt kjarasamningi Isavia og Sameykis sem gilti frá 1. nóvember 2022 til 31. janúar 2024.

Aðgerðirnar munu koma til framkvæmda kl. 16:00 hinn 9. maí 2024 fáist samþykki félagsfólks í rafrænni atkvæðagreiðslu. Fyrirkomulagið mun verða eins og hér greinir:

• Frá kl. 16:00 fimmtudaginn 9. maí 2024 hefst ótímabundið yfirvinnubann. Yfirvinnubannið nær til alls félagsfólks Sameykis sem starfar hjá Isavia ohf.
  
  
• Frá kl. 16:00 fimmtudaginn 9. maí 2024 hefst ótímabundið þjálfunarbann. Þjálfunarbann tekur til félagsfólks Sameykis sem starfar hjá Isavia ohf. sem leiðbeinendur og vottaðir leiðbeinendur á gólfi.
  
  
• Á tímabilinu frá kl. 04:00-08:00, föstudaginn 10. maí 2024, mun starfsfólk sem sinnir öryggisleit á Keflavíkurflugvelli leggja niður störf sín.
  
  
• Á tímabilinu frá kl. 08:00-12:00, föstudaginn 10. maí 2024, mun starfsfólk sem sinnir farþegaflutningum á Keflavíkurflugvelli leggja niður störf sín.
  
  
• Á tímabilinu frá kl. 04:00-08:00, fimmtudaginn 16. maí 2024, mun starfsfólk sem sinnir öryggisleit á Keflavíkurflugvelli leggja niður störf sín.
  
  
• Á tímabilinu frá kl. 04:00-08:00, föstudaginn 17. maí 2024, mun starfsfólk sem sinnir öryggisleit á Keflavíkurflugvelli leggja niður störf sín.
  
  
• Á tímabilinu frá kl. 08:00-12:00, föstudaginn 17. maí 2024, mun starfsfólk sem sinnir farþegaflutningum á Keflavíkurflugvelli leggja niður störf sín.
  
  
• Á tímabilinu frá kl. 04:00-08:00, mánudaginn 20. maí 2024, mun starfsfólk sem sinnir öryggisleit á Keflavíkurflugvelli leggja niður störf sín.

Atkvæðagreiðsla hefst klukkan 13:00 mánudaginn 29. apríl 2024 og henni lýkur klukkan 13:00 fimmtudagur 2. maí 2024. Atkvæðagreiðslan fer fram rafrænt í gegnum mínar síður Sameykis. Allt kosningabært félagsfólk Sameykis sem starfar hjá ISAVIA ohf. skv. ofangreindum kjarasamningi fær send kjörgögn í tölvupósti ásamt hlekk á rafrænan atkvæðaseðil.

Til að greiða atkvæði þarf rafræn skilríki. Félagsfólk sem ekki er á kjörskrá en telur sig hafa atkvæðisrétt getur sent erindi þess efnis til Sameykis, ingolfur@sameyki.is eða haft samband í síma 525 8330.