Brú lífeyrissjóður og Almenni lífeyrissjóðurinn í samstarf

Brú lífeyrissjóður hefur hafið samstarf við Almenna lífeyrissjóðinn í séreignarmálum. Í tilkynningu frá Brú segir að með samstarfinu sjái lífeyrissjóðurinn fjölmörg tækifæri til að auka þjónustu við sjóðfélaga.

„Á síðustu árum hefur áhugi á séreignarsparnaði aukist, meðal annars vegna hækkunar á skylduiðgjaldi í lífeyrissjóð og auknum sveigjanleika til að greiða í séreign. Vegna þessa skoðaði Brú þann möguleika að stofna að nýju séreignardeild og deild fyrir tilgreinda séreign en niðurstaða greiningarvinnu var að slíkt væri kostnaðarsamt og óhagkvæmt fyrir sjóðfélaga. Sjóðurinn ákvað því að ganga til samstarfs við Almenna lífeyrissjóðinn sem hefur áratuga reynslu af rekstri séreignarsjóða, hefur skilað góðri langtímaávöxtun og leggur áherslu á góða upplýsingagjöf til sjóðfélaga,“ segir í fréttatilkynningu frá Brú.

Þá segir í tilkynningunni að með samstarfinu vilji Brú upplýsa sjóðfélaga sína að hjá Almenna lífeyrissjóðnum sé hægt að velja á milli sjö ávöxtunarleiða fyrir séreignarsparnað, allt frá 100% í íslenskum innlánum yfir í 100% í erlendum eignum. Brú segir að sjóðfélagar geti valið úr leiðum með tilliti til aldurs og áhættuþols og að ekki sé greiddur sölu- eða upphafskostnaður.