Yfirlýsing stjórnar Sameykis

Vegna umræðu um starfslokasamning við fyrrverandi formann Sameykis vill stjórn félagsins koma eftirfarandi á framfæri. Í mars 2024 var ný stjórn kjörin til forystu í Sameyki. Á sama tíma var þáverandi formaður endurkjörinn til þriggja ára. Hann var einn í framboði og því sjálfkjörinn.

Eins og fram hefur komið í fjölmiðlum hefur gengið á ýmsu hjá félaginu síðustu misseri. Í byrjun október 2024 var ljóst að formaðurinn nyti ekki lengur trausts stjórnar og starfsfólks Sameykis né forystu BSRB og vék því úr stjórn. Það var hvorki einföld né auðveld ákvörðun en nauðsynleg til að tryggja starfsemi og hag félagsins.

Samkvæmt lögum félagsins er ekki hægt að segja félagslega kjörnum formanni upp störfum en þegar ljóst var að formaðurinn myndi ganga úr stjórn voru tvö og hálft ár eftir af kjörtímabili hans. Að fengnu lögfræðiáliti og með aðkomu sáttamiðlara varð niðurstaðan sú að fyrrverandi formaður myndi halda óbreyttum launakjörum út kjörtímabilið, en þau eru ákvörðuð af launanefnd Sameykis.

Stjórn Sameykis vinnur nú að því að setja sér starfsreglur til að tryggja að svona aðstæður geti ekki komið aftur upp innan félagsins. Á sama tíma er nauðsynlegt að gera starfsemi þess gagnsærri en hingað til – meðal annars með því að birta fundargerðir stjórnar á vef þess.

Sameyki stendur á sterkum grunni og með samstöðu, virðingu og ábyrgð að leiðarljósi höldum við áfram að byggja upp öflugt félag sem berst fyrir hagsmunum félagsmanna.