Heiðrun trúnaðarmanna á aðalfundi 2025

Meðal síðustu dagskrárliða á aðalfundi Sameykis sem fram fór í gær, 27. mars, var heiðrun trúnaðarmanna Sameykis á tveimur vinnustöðum. Við það tilefni voru Helenu Sigurbergsdóttur, trúnaðarmanni hjá Isavia í Reykjanesbæ, og Þórunni Gonu Helgadóttur, trúnaðarmanni hjá íbúðakjarna við Teigasel 1 í Reykjavík, veitt viðurkenning fyrir framúrskarandi alúð í störfum sínum sem trúnaðarmenn.

Helena Sigurbergsdóttir hefur gegnt stöðu trúnaðarmanns f.h. Sameykis frá árinu 2017 ásamt því að vera í samninganefnd, þar sem hún hefur gætt af mikilli festu hagsmuna starfsfólks, staðið vörð um réttindi þeirrra og barist fyrir bættri vinnuaðstöðu félagsmanna sinna og starfsfélaga á ört stækkandi vinnustað.

Þórunn Gona Helgadóttir hefur gegnt stöðu trúnaðarmanns Sameykis frá árinu 2021 og staðið þéttan vörð um hagsmuni og réttindi vinnufélaga sinna ásamt því að koma á umbótum á vinnuaðstöðu þeirra. Þórunn sat í samninganefnd Sameykis við gerð síðustu kjarasamninga og sýndi þar mikinn dugnað og staðfestu.

Yfir 300 manns um land allt
Alls gegna um 330 manns stöðu trúnaðarmanns fyrir hönd Sameykis á vinnustöðum um land allt. Trúnaðarmenn eru meðal mikilvægustu tengiliða Sameykis við félagsfólk á vinnustöðum landsins og er það því ekki að ástæðulausu sem löng hefð ríkir fyrir því að heiðra árlega tvo trúnaðarmenn sem staðið hafa dyggan vörð um réttindi starfsmanna á vinnustöðum sínum. Helena og Þórunn eru á meðal þeirra sem það hafa gert af mikilli alúð og voru þeim á aðalfundinum færður þakklætisvottur frá félaginu fyrir framúrskarandi störf í þágu hagsmuna félagsmanna Sameykis.