Stofnanir ársins 2024 eru Félagsmiðstöðin Sigyn, Fjölbrautaskóli Suðurnesja, Heilsustofnun NLFÍ, Hitt húsið, Kvikmyndasafn Íslands, Leikskólinn Lyngheimar og Þjóðskrá Íslands. Hástökkvarar ársins eru Íbúðakjarni Rökkvutjörn og Menningar- og viðskiptaráðuneytið.
Niðurstöður í vali á Stofnun ársins 2024 var tilkynnt á hátíð Sameykis 13. febrúar 2025 en titlana Stofnun ársins - ríkisstofnanir, Stofnun ársins - borg og bær og Stofnun ársins - sjálfseignastofnanir og fyrirtæki í almannaþjónustu hljóta þær stofnanir sem þykja skara fram úr í þeim níu þáttum sem könnunin byggir á að mati starfsfólks þeirra. Um er að ræða mat á innra starfsumhverfi stofnana og starfsstaða. Þættirnir níu eru trúverðugleiki stjórnenda, starfsandi, launakjör, vinnuskilyrði, sveigjanleika í starfi, sjálfstæði í starfi, ímynd stofnunar, ánægju og stolt og jafnrétti.
Þátttakendur hafa aldrei verið fleiri í Stofnun ársins en nú, en í ár tóku tæplega 17.400 þátt í könnuninni. Reykjavíkurborg er þátttakandi í könnuninni með allt starfsfólk í þriðja sinn en allt ríkisstarfsfólk hefur tekið þátt síðan árið 2011. Við gerð þátttökulista var miðað við að starfsfólk sem fékk könnunina senda væri starfandi í ágúst og október og væri í að lágmarki 20% starfshlutfalli.
Stofnun ársins er samstarfsverkefni Sameykis, Fjármála- og efnahagsráðuneytisins, Reykjavíkurborgar og fjölmargra annarra stofnana en hún nær til um 35.000 manns á opinberum vinnumarkaði. Tilgangur með vali á Stofnun ársins er að taka eftir og verðlauna vinnustaði sem ná framúrskarandi árangri við stjórnun mannauðs. Þá nýtist könnunin stjórnendum til að vinna að umbótum í stjórnun og starfsumhverfi. Að lokum veitir könnunin aðhald til hagsbóta fyrir starfsfólk, skjólstæðinga, viðskiptavini og aðra hagsmunaaðila.
Alls fengust gild svör frá tæplega 17.400 starfsmönnum og svarhlutfallið var tæplega 52 prósent.
Aðaltöflur – Sjálfseignarstofnanir og fyrirtæki í almannaþjónustu
Vinningshafar - Sjálfseignarstofnanir og fyrirtæki í almannaþjónustu
Happdrætti Stofnun ársins 2024
Málþing um Jákvæða vinnustaðamenningu sem haldið var 13. febrúar 2025
