Félagsfólk Sameykis getur sótt um orlofsávísun að andvirði 35.000 kr. á sama hátt og sótt er um orlofshús og íbúðir á Orlofshúsavef Sameykis
meðan á umsóknarferli sumarúthlutunar stendur. Félagsfólk fær mögulega annað hvort orlofshús eða orlofsávísun úthlutað. Orlofsávísanirnar eru gefnar út í takmörkuðum magni og kosta félagsfólk 10 punkta. Orlofsávísanirnar gilda fyrir orlofstilboð innanlands sumarið 2025, frá 23. maí til 22. ágúst og verða því að vera nýttar innan þess tímabils. Félagi sem fær úthlutað orlofsávísun framvísar kvittunum eftir að ferð að eigin vali er lokið og fær andvirði orlofsávísunar greitt inn á bankareikning sinn. Kvittanir verða að vera löglegar frá viðkomandi söluaðila og innan tímabilsins 23. maí - 22. ágúst 2025. Kvittanir verða að vera með nafni og kennitölu félagsmanns til þess að fást greiddar.
Orlofsávísanir gilda innanlands fyrir:
- Gistingu utan orlofskerfis, þ.e. hótel, gistihús, tjaldstæði o.s.frv. (Passa að fá kvittun með nafni/kennitölu.)
- Leigu fyrir hjólhýsi, fellihýsi, bílaleigubíl eða tjaldvagna.
- Skoðunarferðir, t.d. hvalaskoðun, fuglaskoðun o.þ.h.
- Skipulagðar gönguferðir með viðurkenndum ferðaþjónustuaðilum eða félögum, utan þeirra ferða sem félagið býður upp á.
- Skipulagðar hópferðir, hestaferðir, siglingar, veiðileyfi o.s.frv.
Ekki er hægt að framvísa kvittunum fyrir matarútgjöldum, bensíni og/ eða almennum ferðakostnaði, svo sem fargjaldi í flugi, rútu eða með ferju, nema það sé hluti af skipulagðri hópferð. Ekki er endurgreitt vegna aðgangs í sundlaugar eða á baðstaði. Ekki er hægt að framvísa kvittunum fyrir þjónustu sem Sameyki eða önnur stéttarfélög bjóða sínum félögum.
- Senda skal kvittanir á netfangið orlof@sameyki.is
- Óskað er eftir að kvittunum sé skilað í einu lagi.
- Greiðsla á orlofsávísunum fer fram í lok ágúst 2025
Athugið að skila þarf kvittunum með nafni og kennitölu félagsmanns til að þær fáist greiddar.
